नवराज्य डिजिटल न्यूज नेटवर्क
शिरसोली – प्राथमिक आरोग्य केंद्र म्हसावद अंतर्गत उपकेंद्र शिरसोली येथे दिनांक १७ सप्टेंबर २०२५ रोजी जिल्हा प्रशासन व आरोग्य विभागाच्या मार्गदर्शनाखाली ‘स्वस्थ नारी–सशक्त परिवार अभियान’, टीबी मुक्त भारत, किशोरी स्वस्थ सेवा आदी उपक्रमांतर्गत भव्य आरोग्य तपासणी शिबिराचे आयोजन करण्यात आले.
या शिबिरात शिरसोली गावातील २७ गर्भवती महिलांची तपासणी करण्यात आली. तसेच एकूण २८० नागरिकांची बीपी, डायबेटीस, डोळे (मोतीबिंदू), संशयित क्षयरोग तपासणी, लहान बालकांचे लसीकरण तसेच किरकोळ आजारांवर तपासणी व उपचार करण्यात आले. यावेळी नागरिकांना आरोग्य शिक्षण, स्वच्छतेचे महत्त्व, तसेच प्रतिबंधात्मक उपाययोजनांची सविस्तर माहिती देण्यात आली.
कार्यक्रमास जिल्हाधिकारी, मुख्य कार्यकारी अधिकारी, जिल्हा आरोग्य अधिकारी डॉ. सचिन भायेकर, तालुका आरोग्य अधिकारी डॉ. पांढरे यांच्या मार्गदर्शनाखाली प्रा. आ. केंद्र म्हसावदचे वैद्यकीय अधिकारी डॉ. प्रणव, डॉ. करिष्मा जैन, डॉ. प्रशांत इंगळे, डॉ. करुणा भालेराव, डॉ. फेगडे, डॉ. सलीम पिंजारी यांनी वैद्यकीय सेवा दिली.
शिबिरासाठी सरपंच, गावातील प्रतिष्ठित नागरिक, शिक्षक, अंगणवाडी सेविका, महिला बचतगट, आशा वर्कर तसेच प्रवीण भोळे, गजानन ग्यार यांनी सहकार्य केले. या शिबिराचा मोठ्या प्रमाणावर नागरिकांनी लाभ घेतला.
