नवराज्य Live न्यूज नेटवर्क
जळगाव : महाराष्ट्र विधान परिषद जळगाव स्थानिक प्राधिकार मतदार संघ निवडणूक 2026 साठी आज, गुरुवार दि. 18 जून रोजी सकाळी 8 वाजेपासून मतदान प्रक्रियेला सुरुवात झाली. जिल्ह्यातील विविध 7 मतदान केंद्रांवर शांततेत मतदान प्रक्रिया सुरू असून सकाळी मतदानाला प्रारंभ झाल्यानंतर सकाळी 10:30 वाजेपर्यंत तहसीलदार कार्यालय येथील मतदान केंद्रावर 65टक्के मतदारांनी आपला मतदानाचा हक्क बजावला आहे.
या निवडणुकीसाठी एकूण 630 मतदार मतदानाचा हक्क बजावणार असून त्यामध्ये 315 पुरुष व 315 महिला मतदारांचा समावेश आहे. सकाळपासूनच विविध मतदान केंद्रांवर मतदारांची उपस्थिती दिसून येत आहे.
मतदानासाठी जिल्ह्यात पुढील सात केंद्रांची व्यवस्था करण्यात आली आहे :
तहसीलदार अमळनेर यांचे दालन
नगर परिषद फैजपूर यांचे सभागृह
उपविभागीय अधिकारी भुसावळ यांचे जुने दालन
तहसीलदार जळगाव यांचे दालन
कर्मवीर अभ्यासिका, नगर परिषद एरंडोल
तहसीलदार पाचोरा यांचे दालन
तहसीलदार चाळीसगाव यांचे दालन
मतदानासाठी भारत निवडणूक आयोगाने पुरविलेले मतदान ओळखपत्र अथवा स्थानिक स्वराज्य संस्थेने दिलेले ओळखपत्र बंधनकारक करण्यात आले आहे.
मतदानाची प्रक्रिया गुलाबी रंगाच्या मतपत्रिकेद्वारे पार पडत असून मतदारांना उमेदवारांच्या नावासमोर पसंतीक्रम द्यावा लागत आहे. मतदानासाठी भारत निवडणूक आयोगाने पुरविलेल्या जांभळ्या स्केचपेनचाच वापर करण्यात येत आहे.
मतदान केंद्रांवर सुरक्षा व्यवस्था कडक ठेवण्यात आली असून मोबाईल फोन, कॅमेरा किंवा अन्य इलेक्ट्रॉनिक साधनांना केंद्रामध्ये बंदी घालण्यात आली आहे. प्रशासनाकडून मतदान प्रक्रिया पारदर्शक आणि शांततेत पार पाडण्यासाठी विशेष खबरदारी घेण्यात येत आहे.
दरम्यान, मतदान प्रक्रिया पूर्ण झाल्यानंतर सर्व मतपेट्या जिल्हाधिकारी कार्यालय, जळगाव येथील अल्पबचत भवनातील सुरक्षा कक्षात ठेवण्यात येणार असल्याची माहिती प्रशासनाकडून देण्यात आली आहे.
