नवराज्य Live न्यूज नेटवर्क
जळगाव :शहरातील श्रीकृष्ण शैक्षणिक व सांस्कृतिक मंडळाच्या संस्थेमध्ये कोट्यवधी रुपयांच्या आर्थिक गैरव्यवहाराचा धक्कादायक प्रकार समोर आला असून, याप्रकरणी संस्थेच्या लेखापालाविरोधात एमआयडीसी पोलिस ठाण्यात गुन्हा दाखल करण्यात आला आहे. प्राथमिक माहितीनुसार, तब्बल ४ कोटी ८५ लाख रुपयांहून अधिक रकमेचा अपहार झाल्याचे निष्पन्न झाले आहे.
माजी मंत्री गुलाबराव देवकर यांच्या अध्यक्षतेखाली कार्यरत असलेल्या या संस्थेच्या शिरसोली रोडवरील महाविद्यालयात लोकेश उर्फ चेतन गणेश कोल्हे (रा. नशिराबाद) हा लेखापाल म्हणून काम पाहत होता. १ ऑगस्ट २०२० ते ३१ मे २०२३ या कालावधीत विद्यार्थ्यांकडून जमा झालेले शुल्क तसेच संस्थेच्या नावे आलेले विविध धनादेश अधिकृत बँक खात्यात जमा न करता त्यांचा परस्पर वापर केल्याचा आरोप त्याच्यावर ठेवण्यात आला आहे.
संस्थेच्या आर्थिक व्यवहारांची पडताळणी करताना मोठी तफावत आढळून आल्यानंतर पदाधिकाऱ्यांनी याची गंभीर दखल घेतली. त्यानंतर माजी मंत्री गुलाबराव देवकर यांनी पोलिसांकडे तक्रार अर्ज सादर केला होता. या तक्रारीच्या आधारे आर्थिक गुन्हे शाखेकडून प्राथमिक चौकशी करण्यात आली.
तपासादरम्यान मोठ्या प्रमाणात आर्थिक अनियमितता झाल्याचे समोर आल्यानंतर पुढील कायदेशीर प्रक्रिया सुरू करण्यात आली. त्यानंतर मंगळवारी एमआयडीसी पोलिस ठाण्यात अधिकृत फिर्याद दाखल करण्यात आली असून, लेखापालाविरोधात अपहार, विश्वासघात आणि आर्थिक फसवणुकीसंदर्भातील विविध कलमान्वये गुन्हा नोंदवण्यात आला आहे.
गुन्हा दाखल झाल्यानंतर पोलिस निरीक्षक बबन आव्हाड व सहायक पोलिस निरीक्षक गणेश फड यांनी महाविद्यालय परिसराला भेट देत संबंधित कागदपत्रांची तपासणी केली. तपासासाठी आवश्यक असलेले आर्थिक व्यवहारांचे रेकॉर्ड, पावत्या आणि दस्तऐवज पोलिसांनी ताब्यात घेतले आहेत.
दरम्यान, या घटनेमुळे शैक्षणिक वर्तुळात मोठी खळबळ उडाली असून, पुढील तपासात आणखी आर्थिक व्यवहार समोर येण्याची शक्यता वर्तवली जात आहे. एमआयडीसी पोलिस या प्रकरणाचा अधिक तपास करत आहेत.
