नवराज्य Live न्यूज नेटवर्क
जळगाव- महानगरपालिका निवडणूकित भाजप – शिवसेना महायुतीने बहुमताचा आकडा पार केला असून.मात्र निवडणुकीनंतर जळगाव शहराच्या राजकारणात महापौर आणि उपमहापौर पदाबाबत मोठी उत्सुकता निर्माण झाली होती. अखेर आज महायुतीकडून या दोन्ही महत्त्वाच्या पदांसाठी उमेदवारांची अधिकृत घोषणा करण्यात आली असून, जळगाव महापालिकेच्या सत्तास्थापनेचा मार्ग मोकळा झाला आहे.
या निवडणुकीत भाजपने सर्वाधिक 46 जागा जिंकत प्रमुख पक्ष म्हणून आपले वर्चस्व सिद्ध केले. शिवसेनेला 22 जागा मिळाल्या, तर राष्ट्रवादी काँग्रेसला एक जागा प्राप्त झाली. याशिवाय एका जागेवर अपक्ष उमेदवार विजयी ठरला असून पाच जागांवर शिवसेना (उद्धव बाळासाहेब ठाकरे गट) विजयी झाली आहे.
मतमोजणी पूर्ण झाल्यानंतर महापौरपदासाठी ओबीसी महिला आरक्षण जाहीर झाले आणि त्यामुळे या पदावर कोणाची वर्णी लागणार, याकडे सर्वांचे लक्ष लागले होते. भाजपकडून या पदासाठी प्रामुख्याने तीन महिला नगरसेवकांची नावे चर्चेत होती. प्रभाग क्रमांक 12 मधून बिनविरोध निवडून आलेल्या उज्वला बेंडाळे, प्रभाग क्रमांक 7 मधून बिनविरोध निवडून आलेल्या दीपमाला काळे तसेच प्रभाग क्रमांक 13 मधील वैशाली पाटील यांच्यात चुरस निर्माण झाल्याचे चित्र होते.
मंत्री. गिरीश महाजन यांनी केली महापौर उपमहापौरांची निवड
दरम्यान, आज महापौरपदासाठी अर्ज दाखल करण्याच्या अंतिम दिवशी महायुतीकडून नावांची अधिकृत घोषणा करण्यात आली. मंत्री गिरीश महाजन यांनी महापौर व उपमहापौर पदासाठी उमेदवार जाहीर केले. त्यानुसार भाजपकडून दीपमाला मनोज काळे यांना महापौरपदाची उमेदवारी देण्यात आली आहे. त्या आज महापौरपदासाठी आपला उमेदवारी अर्ज दाखल करणार असून, बहुमताच्या जोरावर त्यांची निवड बिनविरोध होणे जवळपास निश्चित मानली जात आहे.दुसरीकडे, उपमहापौरपदासाठी शिवसेनेकडून प्रभाग क्रमांक 8 मधून बिनविरोध निवडून आलेले मनोज सुरेश चौधरी यांना उमेदवारी देण्यात आली आहे. महायुतीकडे आवश्यक संख्याबळ असल्याने त्यांचीही उपमहापौरपदी बिनविरोध निवड होणार असल्याचे स्पष्ट झाले आहे.
भाजप कार्यालय जी एम फाउंडेशन येथे महायुतीच्या आयोजित बैठकीत महापौर उपमहापौर पदाची घोषणा मंत्री गिरीश महाजन,यांनी केली. यावेळी मंत्री गुलाबराव पाटील, आमदार राजूमामा भोळे, आमदार चंद्रकांत सोनावणे, आमदार मंगेश चव्हाण यांच्यासह भाजपचे शहर जिल्हाध्यक्ष दीपक सूर्यवंशी,गटनेते प्रकाश बालानी, नितीन लढढा शिवसेनेचे जिल्हाध्यक्ष विष्णू भंगाळे आणि महायुतीचे नवनिर्वाचित नगरसेवक मोठ्या संख्येने उपस्थित होते.
