नवराज्य डिजिटल न्यूज नेटवर्क
जळगाव (प्रतिनिधी) – मोबाईलवर व्हिडिओ (रील) बनवण्याचा मोह दोन मित्रांसाठी जीवघेणा ठरल्याची अत्यंत दुर्दैवी घटना रविवारी दि. २५ ऑक्टोबर रोजी सकाळी ११ वाजेच्या सुमारास धरणगाव तालुक्यातील पाळधी चांदसर रेल्वे गेटजवळ घडली आहे. धावत्या रेल्वेसमोर धोकादायक पद्धतीने रील शूट करत असताना अहमदाबाद-हावडा एक्स्प्रेसने धडक दिल्याने या दोन तरुणांचा जागीच मृत्यू झाला. यामुळे गावात शोककळा पसरली आहे.
या भीषण अपघातात मयत झालेल्या तरुणांची नावे प्रशांत पवन खैरनार (वय १८ वर्षे) आणि हर्षवर्धन महेंद्र नन्नवरे (वय १८ वर्षे) अशी आहेत. दोघेही पाळधी येथील महात्मा फुले नगर, प्लॉट भाग (रेल्वे गेट जवळील प्लॉट) येथील रहिवासी होते. दोन्ही तरुण पाळधी चांदसर रेल्वे गेटजवळ रेल्वे ट्रॅकवर मोबाईलवरील लोकप्रिय अॅपसाठी व्हिडिओ (रील) तयार करत होते.
यावेळी धरणगावकडून जळगावकडे जाणाऱ्या अहमदाबाद-हावडा एक्स्प्रेस गाडीची त्यांना धडक बसली.
हा अपघात इतका भीषण होता की दोन्ही तरुणांचा जागीच मृत्यू झाला. त्यांच्या निष्काळजीपणामुळे व साहसी कृत्यामुळे त्यांना आपला जीव गमवावा लागला.
मा.जि प सदस्य प्रतापराव पाटलांसह ग्रामस्थ घटनास्थळी दाखल.
या घटनेची माहिती मिळताच पाळधी पोलीस तातडीने घटनास्थळी दाखल झाले. तसेच जिल्हा परिषदेचे माजी सदस्य प्रतापराव पाटील यांच्यासह ग्रामस्थांनी घटनास्थळी धाव घेऊन माहिती जाणून घेतली. पोलिसांनी पंचनामा करण्याची प्रक्रिया
घेतली. पोलिसांनी पंचनामा करण्याची प्रक्रिया सुरू केली. दोघांचे मृतदेह शासकीय वैद्यकीय महाविद्यालय व रुग्णालय जळगाव येथे हलवण्यात आले. घटनेची पाळधी दुरक्षेत्र पोलीस स्टेशन येथे नोंद करण्यात आली आहे.
